હિરણ હલકાળી નદી રૂપાળી નખરાળી! – કવિ શ્રી દાદ બાપુ

ડુંગરથી દડતી, ઘાટ ઊતરતી, પડતી પડતી આખડતી

આવે ઊછળતી, જરા ન ડરતી, હરતી ફરતી મદઝરતી

કિલકારા કરતી, ડગલાં ભરતી, જાય ગરજતી જોરાળી

હિરણ હલકાળી, જોબનવાળી, નદી રૂપાળી નખરાળી

 

આંકડિયાવાળી, વેલ્ય ઘટાળી, વેલડિયાળી વૃખવાળી

અવળા આંટાળી, જામી જાળી, ભેખડિયાળી ભેવાળી

તેને દઈ તાળી, જાતાં ભાળી, લાખણિયાળી લટકાળી

હિરણ હલકાળી, જોબનવાળી, નદી રૂપાળી નખરાળી

 

જોગંદ જટાળા, ભૂરી લટાળા, ચાલ છટાળા, ચરચાળા

ડણકે ડાઢાળા, સિંહણ બાળા, દસ હાથાળા, દઈ તાળા

મોટા માથાળા, ગ્રજવે ગાળા, હિરણિયાળા હુંકારી

હિરણ હલકાળી, જોબનવાળી, નદી રૂપાળી નખરાળી

 

ગાગડિયાવાળી, મા મમતાળી, ખોડલ માડી ખપરાળી

બેઠી ત્યાં બાળી, કાયમ કાળી, જતન કરાળી, જોરાળી

થાનક લઈ થાળી, નિવેદવાળી, માનવ આવે સરધાળી

હિરણ હલકાળી, જોબનવાળી, નદી રૂપાળી નખરાળી

 

ડેડાં ડળવળતાં, ઝૂંડ ઝંબૂળતાં, મઘરા ફરતા મોં ફાડી

જળકૂકડા ચરતાં, બતક વિહરતાં, દાદુર ડહતા દિનદાડી

માછલીયું ટોળાં, કરે કિલોળા, બગલાં બોળા બહુ ભારી

હિરણ હલકાળી, જોબનવાળી, નદી રૂપાળી નખરાળી

 

આંબા આંબલીયું, ઉમ ઉંબરીયું, ખેર ખીજડીયું, બોરડીયું

કેસુડાં ફળિયું, વા ખાખરિયું, હેમની કળીયું, આવળિયું

પૃથ્વી ઊતરીયું સ્વર્ગીય પરીયું, વેલ્યું વળિયું જળ ઢાળી

હિરણ હલકાળી, જોબનવાળી, નદી રૂપાળી નખરાળી

 

રાણ્યું કોળંબા લઈ અવળંબા, જુવે જળંબા જળબંબા

કરી કેશ કલંબા, બિખરી લંબા, જે જગદંબા બન અંબા

‘દાદ’લ દિલરંગી, છંદ ત્રિભંગી બની ઉમંગી બિરદાળી

હિરણ હલકાળી, જોબનવાળી, નદી રૂપાળી નખરાળી

 

વર્ષામાં ઘેલી, જોમ ભરેલી, નદી નવેલી નવઢાસી

સહુ નદીયું પહેલી, જાતી વહેલી, સાગરઘેલી ચપલાસી

ઠેબે દઈ ઠેલી, હા, હડસેલી, મારગ મેલી ખરતાળી

હિરણ હલકાળી, જોબનવાળી, નદી રૂપાળી નખરાળી

 

ફળફૂલ ખીલંતા, કોષ કીલંતા, પૂંછ ફીરંતા પચરંગી

થૈ થૈ થનગનતાં, મયૂરા કરતાં, નિત નટખટતાં નવરંગી

ઢેલડીયું ઢુંગા, ચણતી રૂંગા; એવા મૂંગા દૃશ્યવાળી

હિરણ હલકાળી, જોબનવાળી, નદી રૂપાળી નખરાળી

 

ખળખળતાં ઝરણાં, લીલાં તરણાં, ચરતાં હરણાં, ઠેક ભરે

કંઈ શ્વેત સુવર્ણા, નીલં વરણાં કંકુ ચરણાં ફૂલ કરે

મધુકર ગુંજારં, ભાત અઢારં, બની બહારં બૃદવાળી

હિરણ હલકાળી, જોબનવાળી, નદી રૂપાળી નખરાળી

 

-કવિ શ્રી દાદ બાપુ

સાભાર : સાહિત્ય વંદના

પોસ્ટ પસંદ આવે તો લાઈક અને શેર કરવાનું ભૂલતા નહિ..

જો તમારી પાસે કોઈ અન્ય જાણવા લાયક માહિતી હોય, તો તમે અમને મેસેજ દ્વારા મોકલાવી શકો છો. જેથી અમે એ માહિતી અમારા બીજા લેખમાં ઉમેરી વધુમાં વધુ લોકો સુધી પહોચાડી શકીએ. જો તમે સેવાકીય કાર્યો, પ્રેરણાત્મક સ્ટોરી, સામાજીક કાર્યો, જાણવા જેવું, હાલના બનાવ, દેશ-વિદેશના સમાચાર, કૃષિ સમાચાર વગેરેની માહિતી મેળવવા માંગો છો તો ફેસબુક પર અમારા પેજને ફોલો કરી અમારી સાથે જોડાયેલા રહો. અમે આવી જ રસપ્રદ અને ઉપયોગી માહિતી તમારા માટે લાવતા રહીશું. આભાર. જય હિન્દ.

Leave a Reply

%d bloggers like this: